Ra’iisul wasaaraha xukuumadda federaalka Soomaaliya, mudane Xasan Cali Khayre, ayaa maanta Muqdisho ku daah-furay kulanka uga billaabmay kooxda xariirka Soomaaliya ee ururka Iskaashiga Islaamka.
Bilowgii furitaanka waxa uu sheegay Ra’iisul Wasaare Xasan Cali Khayre in shirka maanta ee ururka Iskaashiga Islaamka uu astaan u yahay in Soomaaliya oo kamid ah dalalkii aasaasay ay kusoo laabatay fagaaraha iyada oo xal u raadinaysa dhibaatooyinka caalamka ka jira.
Dhammaan mas’uuliyiinta kulanka ka hadlay ayaa bogaadiyay horumarka ay Soomaaliya ku tillaabsatay oo horumuudka u noqotay in shirkaan lagu qabto Muqdisho.
Ajandaha shirkan ayaa ah sidii loo xoojin lahaa xasilloonida ka jirta Soomaaliya oo Sanado badan xaalado amni xumo ka jireen iyo taageerada Soomaaliya.
Wasiiru dowlaha Arrimaha Dibadda Sudan, Wasiiru dawlaha arrimaha dibadda dowladda Qatar, Sultan bin Saad Al Muraikhi Kaaliyaha Wasiirka Arrimaha Dibadda Kuwait iyo Mas’uuliyiin ka kala socota Azerbaijan iyo Ururka Iskaashiga Islaamka ayaa kamid ah Madaxda ka qeyb-galaysa shirkan.
Ururka Iskaashiga islaamka oo ah ururka labaad ee ugu wayn dunida oo ay ku midaysanyihii 57 dowladood ayaa lagu aasaasay dalka Marooko September 25, 1969.
