Madaxweynaha dowlad goboleedka Jubbaland Axmad Maxamed Islaam oo saxaafadda kula hadlay magaalada Kismaayo ee maamulka Jubbaland kadib markii uu ka soo laabtay caleemo saarkii madaxweynaha Puntland ee Garoowe lagu qabtay ayaa waxa uu ka hadlay doorashada madaxtinimo ee ku soo foodleh.
Axmad Madoobe ayaa sheegay in doorashada ku dhici doonto wakhtigeeda oo aysan jirin muddo kordhin la sameynayo, waxaana uu beeniyay wararka qaar ay sheegayaan in dib loo dhigayo doorashada.
“Doorashada Jubbaland waqtigeeda ayay ku dhaceysaa, waqti laguma darayo, Gacanna Al-Shabaab ayaa kaga xoreynayaa deegaanada, gacanna waan ku codeynaynaa”ayuu yiri Axmed Madoobe oo ka hadlayay Kismaayo oo uu dib ugu laabtay.
Bisha soo socota ee August ee sanadkan 2019 ayaa la filayaa in doorashada madaxtinimo ka dhacdo maamulka Jubbaland,waxaana xusid mudan in Axmad Madoobe uu la kulmi doono tartan adag marka la eego sida deegaanadaasi looga doonayo isbadal balaaran.
