Waxa kor u kacday tirada dadkii qaxootiga ahaa ee ku dhintay 2-dii doonyood ee ku rogmay xeebaha Djibouti waxaana tirade dhimashada gaartay 52 ruux.
Wakaaladda wararka ee AFP ah ayaa sheegtay in ay aragtay mayadadka samabynayay biyaha ka hor inta kooxda samatabixintu aynan ku ridin baco cad oo ay safeen xeebaha.
Madaxa ururka IOM ee Djibouti Lalini Veerassamy oo la hadlay wakaaladda wararka ee AFP ayaa sheegay in tirada dhimashadu ay gaartay 52 qof.
Dhacdadan naxdinta leh ayaa muujineysa halista dadka soogalootiga ah ee nugul ay la kulmayaan maadaama ay si aanan caadi aheyn u raadinayaan nolol fiican
Waxa masiibadan ay ka dhacday deegaanka loo yaqaano Godoria ee ku yaala gobolka Ubukh ee waqooyi bari ee dalka Djibouti,waxana tirada dadkii saarnaa doonyahan lagu sheegay 130 qof oo iskugu jira haween iyo rag.
Waxa dad goobjoogayaal ah oo deegaanka ku sugan ay sheegeen in doonyahani ay rogmadeen qiyaastii 30 daqiiqo kadib markii ay ka baxeen sababo la xiriira dadka oo aad loo buux-dhaafiyay iyo mawjado culus sida lagu sheegay war qoraal ah uu soo saaray ururka IOM Arbacadii.
Warkan qoraalka ah ee uu soo saaray ururkan ayaan isagu lagu sheegay dalalka ay u dhasheen dadkan masiibadu ku haleeshay xeebaha Ubukh.
