Wararka Idaacadda Bandhiga Media ay ka heleyso magaalada Boosaaso ee xarunta gobolka Bari ayaa sheegaya in howlgallo saacado badan qaatay ay sameeyeen ciidamada ammaanku.
Howlgallada oo ay ciidanka Puntland ka fuliyeen xaafadaha kale duwan oo ay ka kooban tahay magaalada Boosaaso ayaa ahaa kuwa lagu xaqiijinayo, ammaanka magaalada oo waayadii dambe faraha ka sii baxayay.
Inta ay howlgallada ciidanku wadeen ayay gacanta ku soo dhigeen boqolaal dhallinyaro ah, kuwaasoo loo dhaadhiciyay xabsiyo ku yaalla Boosaaso waxaana lagu weydiinayaa su’aalo.
Muddooyinkii dambe, waxaa magaalada Boosaaso ka dhacayay falal liddi ku ah nabadgalyada magaaladaasi, waxaana halkii ugu dambeeyay lagu khaarajiyay maareeyihii dekadda Boosaaso u qaabilsanaa hay’adda P & O Port oo hoostagta shirkadda DP World.
Dhowaan ayay ahayd, markii taliyaha ciidanka booliska Puntland GEN. Muxiyadiin Axmed Aw Muuse oo shir jaraa’id qabtay uu sheegay in ciidanku ay qaadayaan howlgallo lagu sugayo amniga.
Bandhiga MediaMuqdisho, Soomaaliya
