Gollaha sharci dejinta ee baarlamaanka Koonfur Galbeed Soomaaliya ayaa maanta codka u qaaday gollaha wasiirrada cusub ee dhowaan uu soo magacaabay madaxweynaha maamulkaasi Cabdicasiis Lafta Gareen.
Sida uu horay u shaaciyay guddoomiyaha gollaha baarlamaanka Cabdulqaadir Shariif maanta oo arbaca ah ayaa xukuumadda cusub la hor geeyay baarlamaanka si ay codka ugu qaadaan.
Kulanka maanta oo ahaa kii labaad ee kalfadhiga 7-aad waxaa soo xaadirtay 124 mudane, iyadoo uu shir Gudoominayay Cabdulqaadir Shariif Sheekhunaa Maye oo ah Gudoomiyaha golaha Wakiilada maamulka.
123 Xildhibaan ayaa codka Kalsoonida siisay Wasiirada cusub, waxaana diiday hal mudane, mana jirin cid ka aamustay codeynta.
Meelmarinta xukuumadda kaddib ayaa Madaxweyne Lafta Gareen wuxuu baarlamaanka uga mahadceliyay Kalsoonida ay sida aqlabiyada leh u siiyeen wasiirradiisa.
Madaxweyne Lafta Gareen ayaa baarlamaanka hortiis wasiirrada uga sheegay in shaqada laga sugayo xay u gutaan sida uu dhigayo dastuurka Koonfur Galbeed, waxaana uu ballan qaaday iney ka shaqeyn doonaan Amniga iyo la dagaalanka Musuq Maasuqa.
Sidoo kale waxaa kulanka lagu dhaariyay Wasiirada cusub ee maamulka Koofur Galbeed ee codka Kalsoonida la siiyay, iyadoo todobaadka dambe la filayo inay bilaabato xil la wareegistooda.
Horraantii bishaan ayaa madaxweynaha uu soo magacaabay wasiirro ka kooban 10 waxaana 13-kii bishaan Febraayo ayay ahayd markii uu dhameystiray gollihiisa Wasiirada, taasi oo ka kooban 48 oo kala ah; 23 wasiiro iyo 25 wasiiro ku xigeeno, iyadoo aanu jirin wasiiro dowlayaal.
Bandhiga Media
Muqdisho, Soomaaliya
