Ra’iisul Wasaaraha xukuumadda federaalka Soomaaliya Xasan Cali Khayre ayaa xalay hoyga uu magaalada Muqdisho ka degan yahay ku booqday Madaxweynihii hore ee Soomaaliya Xasan Sheekh Maxamuud.
Madaxweynhii hore ee Soomaaliya ayaa shalay soo gaaray magaalada Muqdisho, waxaana garaoonka diyaaradaha Aadan Cadde ku soo dhaweeyay guddi dowladda ay u xilsaartay soo dhaweyntiisa oo uu horkacayay Wasiirka amniga Soomaaliya.
Khayre ayaa ujeedada booqashadiisa waxa ay la xiriirtay si uu Xasan Sheekh ugu muujiyo soo dhaweyn hab maamuus leh, waxayna masuuliyiintan yeesheen kulan muhiim ah oo ay kaga hadleen xaalada dalka iyo sidii wadajir la isaga kaashan lahaa horumarinta dowladnimada Soomaaliya.
Ra’iisul Wasaare Khayre ayaa Madaxweynihii hore ee dalka warbixin ka siiyay marxalada dalka sida siyaasadda, amniga iyo dhaqaalaha oo ay guulo waa weyn ka sameysay dowladda Soomaaliya.
Madaxweynihii hore ee Soomaaliya Xasan Sheekh Maxamuud ayaa soo dhaweeyay horumarka la gaaray wuxuuna xusay dhammaan bulshada Soomaaliyeed in looga baahan yahay inay taageeraan dowladnimada Soomaaliya.
