Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo ayaa maanta boqolaal Arday ah la wadaagay barnaamij cusub oo ku saabsan waxbarashada kaa oo Wasaaradda Waxbarashada hidaha iyo tacliinta sare ee Soomaaliya soo diyaarisay.
Munaasabadda oo aheyd mid lagu daahfurayay barnaamijka dib u habaynta Waxbarashada Dadaweynaha ayaa sidoo kale lagu xoojinayay nidaamkii waxbarasho ee lacag la’aanta ahaa ee ka jiray dalka.
Mudane Maxamd Farmaajo oo khudbad dhinacyo kala duwan taabatay ka jeediyay halkaasi ayaa waxa uu sheegay in waxbarashada ay tahay xuquuq aas aasi ah oo qof waliba oo kamid ah caruurta dalka ay tahay inuu helo isagoo intaa ku daray in nidaamkii waxbarasho ee dawliga ahaa in la hergelin doono.
Wasaaradda Waxbarashada iyo Tacliinta Sare ee dalka ayaa soo bandhigtay qorshaha ku aaddan waxbarashada lacag la’aanta ah, iyadoona ku dhawaaqday in macalimiinta iyo maamulka dugsiyada ku biiray nidaamka waxbarashada dowliga ah ay ka mid noqon doonaan shaqaalaha Dowladda Federaalka Soomaaliya.
Sidoo kale waxaa munaasabaadi oo arday iyo madax katirsan wasaaradda waxbarashjada ay ku kulmeen lagu soo bandhigay manhajka mideysan ee waxbarashada, waxaana khubarada Soomaaliyeed ee gacanta ku haysa manhajkaasi laga dalbaday in ay xoogga saaraan kor u qadista wadaniyadda, isdhexgalka bulshada iyo kobcinta garaadka iyo garashada jiilasha soo kacaya.
Madaxweyne Maxamed Cabdullaahi Farmaajo ayaa uga mahad celiyey dalladihii aan dowliga ah ee waxbarashada iyo aqoonyahannadii Soomaaliyeed ee dadaalka ku bixiyey samato bixinta waxbarashada dalka iyo badbaadinta mustaqbalka ubadka Soomaaliyeed xilliyadii burburka.
