Xiriirka qaaradda yurub ee UEFA ayaa ku dhawaaqay in fasal ciyaareedka soo aadan (2019/2020) tartanka koobka horyaalada yurub laga hirgalin doono aaladda garsoorka caawisa ee VAR, sidoo kalana waxey ku dhawaaqeen iney tartamo kale u adeegsan doonaan.
Sidoo kale waxaa loo adeegsan doonaa tartanka UEFA Super Cup 2019, koobka qaramada qaaradda yurub ee Euro2020, sidoo kale tartanka UEFA Europa League 2020/2021 iyo final-ka tartanka UEFA National League 2021.
Aaladaan waxaa si fudud loogu isticmaalay koobkii Adduunka ee lagu qabtay Russia, waxaana lagu kala cadeeyay goolal iyo dhacdoyin badan oo muran la galiyay, walow ay sidoo kale abuurtay muranno aan caadi aheyn oo abuurtay kalsooni darro yar.
Madaxweynaha xiriirka kubadda cagta qaaradda yurub Aleksander Ceferin ayaa aad kalsooni ugu qaba in la joogo waqtigii si weyn loo isticmaali lahaa aaladaan, lagana hirgalin lahaa tartamada kala duwan ee ay maamulaan.
Aaladdaan waxaa si toos ah looga isticmaalaa horyaalada talyaaniga iyo Spain, sidoo kalana Premier League si tijaabo ah ayaa looga isticmaalayaa fasalkaan, waxaana loo badinayaa in fasalka soo aadan si weyn looga hirgalin doono.
