Weeraryahankii hore Chelsea Adrian Mutu ayaa lagu amray inuu siiyo Chelsea adduun dhan 15.2 Malyan oo Pound kadib markii laga diiday racfaankii uu u gudbiyay maxkamadda Xuquuqda Aadanaha ee Yurub, marka magaceeda lasoo gaabiyo loo yaqaano (ECHR).
Xiddigii hore qaranka Romania kaas oo haatan 39-jir ah ayaa laga ceyriyay kooxda Chelsea sanadkii 2004 kadib markii laga helay inuu isticmaalay dawooyinka awoodda kordhiya, waxaana lagu riday ganaax dhan 7-bilood oo kaga yimid hay’adda FIFA.
Maxkamadda xalinta khilaafaadka ciyaaraha ee (CAS) ayaana ku amartay inuu gudo dhaawacii uu u geystay Chelsea maadaama uu jabiyay heshiiskii uu kula jiray ee dhamaanayay 2009, intaas kadib Mutu wuxuu ku eedeeyay maxkamadda (CAS) ineysan aheyn mid dhex-dhexaad ah maadaama uu xiriir ka dhaxeeyo mid ka mid ah qareenada Blues iyo milkiile Roman Abramovich.
Si kastaba maxkamadda ECHR ayaa si hordhac ah u heshay in Mutu uusan cadeyn eedeymaha markii uu kasoo gudbinayay, waxaana sanadkii 2010 la helay iney Chelsea ku guuleysatay kiiska.
