Waxaa cabsi xooggan laga muujinayaa in ay joogsato shaqada garoonka diyaaradaha Ugaas Nuur ee magaalada Dhuusamareeb oo iminka ah caasimadda dowlad goboleedka Galmudug.

Masuuliyiin ka tirsan garoonka ayaa xaqiijiyay in walaaca ah in shaqada garoonka ay joogsato ay qabaan taasoo ay u sababeynayaan in xilli roobaad la gelayo, waxayna sababi kartaa dhaqaalaha hoos u dhaca.

Xilliyada roobabka ayaa dhowr jeer waxaa horay u dhacay in biyo badan ay fariistaan garoonka diyaaradaha magaalada Dhuusamareeb taasoo keeneysa in diyaaraduhu ay caga dhigan waayaan garoonkaasi.

Arrintani ayaa haddii ay dhacdo, waxaa ay culeys ku noqon kartaa arrimaha maamul u dhisidda Galmudug sababo la xiriira dib u dhac ku yimaada wafuuddii tegi lahayd magaalada.

Dhanka kale, guddoomiyaha magaalada Dhuusamareeb ayaa dhowaan xaafado ka tirsan magaaladaasi waxaa uu ku dejiyay carro oo ku buuxinayo waddooyin ay roobabka biyo dhigi jireen.

Guddoomiye Macallin Nuur Cilmi Garre ayaa sheegay in arrintani ay uga hortagayaan biyaha roobka inay fariistaan magaalada dhexdeeda taasoo caafimaadka iyo bilicdaba wax u dhimeysa.

Magaalada Dhuusamareeb ee caasimadda Galmudug ayaa waxaa ka soconaya howlo kale duwan iyo wafdiyo kale duwan ay tagaan had iyo goor.

Bandhiga Media

Muqdisho, Soomaaliya